सर्लाही । राष्ट्रिय स्वतन्त्र पार्टी (रास्वपा) को सर्लाही जिल्ला अधिवेशन स्थगित भएको छ । मतदाता नामावलीलगायत प्रक्रियागत विषयमा त्रुटि देखिएको जनाउँदै जिल्ला निर्वाचन समितिले अधिवेशन स्थगित गरेको हो ।
हरिवनस्थित सरस्वती पार्टी प्यालेसमा आयोजना गरिएको अधिवेशनका लागि जिल्लाभरबाट कार्यकर्ता बिहानैदेखि जम्मा भएका थिए । अधिवेशनको उद्घाटन र नेतृत्व चयन प्रक्रिया अघि बढ्ने अपेक्षामा रहेका कार्यकर्तालाई दिउँसो करिब पौने ४ बजे अधिवेशन स्थगित गरिएको जानकारी गराइएको थियो ।
जिल्ला निर्वाचन समितिका संयोजक डा. जयप्रकाश महतोद्वारा हस्ताक्षरित विज्ञप्तिमा मतदाता नामावलीसहित केही प्रक्रियागत त्रुटि भेटिएकाले अधिवेशन तत्कालका लागि स्थगित गरिएको उल्लेख छ । नयाँ मिति भने पछि तय गरिने जनाइएको छ ।
स्थगनको सूचना सार्वजनिक भएसँगै कार्यक्रम स्थलमा उपस्थित कार्यकर्ताले असन्तुष्टि जनाएका थिए । दिनभर चर्को गर्मीमा कार्यक्रम स्थलमा राखेर अन्तिम समयमा अधिवेशन स्थगित गरिएको भन्दै केही कार्यकर्ताले नेतृत्वको आलोचना गरेका थिए ।
त्यस क्रममा कार्यकर्ताबिच भनाभन र सामान्य धकेलाधकेलको अवस्था समेत सिर्जना भएको प्रत्यक्षदर्शीले बताएका छन् ।
